世事真的奇妙也好玩，好玩在冇人知道明天會如何，金錢世界瞬息萬變，除非神仙，永遠不知會「開乜」？（知早一分鐘已發達！）
就此我多年做的理財分享會必強調──「一動不如一靜」！除非充分了解投資目標，而又有相當成數肯定不會蝕（能否賺已是下一步）才好動手，否則記住「唔買就唔蝕」。
散戶耳仔軟衰貪心
以上論調講過N次，但真正執行的散戶肯定很少。因大部分人耳仔軟（聽呢個嗰個話買呢隻嗰隻）也貪心，更甚是信一個似是而非的論調——唔投資好蠢，蝕通脹。
蝕通脹？一年蝕得幾多？兩巴仙好未？但買錯貨，蝕2至3成比比皆是，兼且佣金手續費必須在買賣時付出，略用邏輯分析，已知哪個做法更精明！
於6年前一次分享會中，小弟當然又介紹這個重要概念。6年過去，上周在某場合遇到位中年女士，熱誠地埋嚟講：「碌Sir多謝你呀！若非6年前遇見你，我今日起碼冇咗200萬！」乜事？原來C女士聽完我講座後1年，丈夫突然急病離世，剩下500萬現金畀佢。
C女士投資經驗甚少，但當閨中密友知道佢有咁大筆錢時，紛紛給予「投資意見」。有的話買樓收租可賺升兼賺租；有的話買的士牌安心齋收租，交租車公司打理唔使煩；有的話買股票最好，揸盈富基金穩陣；有的話買外幣等。
總之冇一個叫佢唔好郁，等過晒哀傷期後，諗清諗楚才決定任何投資。C女士醒起早年母親方法，將所有私己錢放在餅乾罐唔郁，其後父親生意失敗，正正是靠餅乾罐的「救命錢」翻身。
亂買隨時蝕到入肉
其實丈夫離世，C女士已心亂如麻，邊有興趣做甚麼投資，加上記起我分享會中的分析，於是連將錢存銀行都費事，只將所有現金放餅乾罐。
五年過去了，香港經濟發生乜事人人知。C女士睇睇身邊人，當時忠告佢投資的閨中好友，全部蝕到叫阿媽！最少的蒸發2成資產，個別更變成負資產，認真欲哭無淚。
資深傳媒人 曾智華
