鄭秀文（Sammi）今日（15日）出席品牌開幕活動，提到日前入場睇電影《焚城》，驚喜現身支持好友劉德華（華仔）。Sammi笑言很久未跟華仔見面，見到對方份外開心，20年前跟華仔結下友情，一見面心領神會，又指華仔很忙，既做演唱會又馬不停蹄為電影宣傳。談到可會為華仔香港站演唱會自薦做嘉賓，Sammi笑指華仔未有邀請她，不過會好多人想做華仔演唱會嘉賓，大家在心中。她說：「華仔喺電影上好盡力，作為朋友唔係關心佢工作好唔好，而係身體，希望佢身體最重要。」
Sammi指早前睇到華仔巡唱期間險些出意外的片段，見到舞台滑捋捋，但認為意外很難講，希望對方小心一點，不過華仔狀態很好。談到可會跟華仔在電影上再次合作，Sammi坦言當然想，但不會為合作而合作，有適合劇本最緊要，跟華仔已合作過六、七次，對上一次兩人合作電影《盲探》，能否再次合作要交由個天。Sammi續說想不到華仔想喜劇版《焚城》，不過對方創作力較高，自己只不過以演員角度領略不到，相信對方在腦海中有新意念，又認為原班人馬再拍很值得。談到她久未演出喜劇，Sammi直認不諱，近年大多演出劇情片，如果有劇本適合也可拍喜劇但一切視乎劇本。談到奪得影后殊榮後，至今未有演出，問到是否揀選劇本有壓力？Sammi笑說：「無壓力，都拎咗囉！好似啲人催仔女結婚，結咗無壓力！唔會因為拎咗獎而嚴選劇本，其實一直有睇劇本，但有啲唔啱，覺得角色麻麻地。劇本唔愁，但要揀自己好有Feel。」
Sammi自認年紀大，反而要工作之外，也要休息，亦覺得美食好緊要，本身完成演唱會後休息一段日子，明年頗為繁忙，但也要留時間陪家人。她說：「媽媽前排唔舒服爭啲入醫院，有一日佢直情行唔到，原來膝蓋入咗細菌發炎，我覺得佢人生學習緊個階段，行唔好需要坐輪椅，老人家要一步步接受身體變化，好彩媽媽係好樂觀嘅人，坐上輪椅話好啱坐，心態調較相當好，做仔女壓力無咁大。」她又指不時探望媽媽，希望媽媽身體情況較好就會帶同出外吃飯，又認為無論媽媽或自己也在人生中也不斷學習。
另外，提到黎芷珊主持節目《戰場上》有指被投訴而腰斬，原定她跟Sammi11月9日出席活動，主辦方突然宣布取消。問到Sammi受到影響可感到不開心？她說：「完全無呢個感受，反而覺得大會咩決定令成件事最好同最恰當做到最好。」
