【冲遊泰國10／波波／黃婧靈】《冲遊泰國》系列由胡慧冲聯同多位「冬蔭家族」擔任主持，節目近日推出第10輯《冲遊泰國10》，今輯《冲遊泰國》加入有「TVB咪神」之稱的黃婧靈（波波）擔任主持大獲好評。節目中，波波換上多套泳裝出鏡大騷美好身段，幾乎每集都有「落水」鏡頭，再加上波波與胡慧冲的互窒對答令觀眾笑得開懷，令波波再度人氣急升。波波接受《星島頭條》訪問時表示，有留意網民的留言，對於得到大家喜愛感到相當開心：「希望下一輯《冲遊泰國》可以繼續同冲哥合作，期望會有更多新嘅視覺衝擊畀大家，希望網民可以繼續幫手支持吓，等我可以做『冬蔭波波』！」
冲遊泰國10｜波波首次穿整套比堅尼上鏡
《冲遊泰國10》在上月底播出，至今12集已全數出街，播出期間引起網民討論。波波笑言今次拍攝最難忘是以泳裝示人，她說：「我之前拍節目冇試過著一套（比堅尼）泳衣出鏡，今次對我都係好大挑戰，因為唔係淨係著一件，係每日要著4至5套，每套都唔一樣，同埋每一套泳衣都係第一次著，所以希望大家都感受到我嘅誠意。」
波波指今次在《冲遊泰國10》中其中一個新體驗是欣賞猛男騷，「我之前冇睇過，仲要都係第一次喺遊輪上面睇猛男騷，氣氛超好，同埋啲猛男都有舉高我，我冇諗過可以同佢哋有咁近距離嘅互動，真係令人十分熱血沸騰，再加埋異常興奮！」另外，她指節目中其中一個鏡頭需拍攝一眾猛男輪流親吻她的手，她笑說：「嗰個體驗係好神奇，完全感受到泰國嘅熱情。」
相關閱讀：波波黃婧靈拍旅遊節目水着放題率先睇！齊玩蠱惑開窿挑戰郭珮文「TVB咪神」地位
冲遊泰國10｜波波與胡慧冲愛爆肚演出
談到她與胡慧冲在節目中的互動，波波指她是比較喜歡即興演出，與冲哥可謂一拍即合，在整個拍攝過程中，又獲冲哥和整個拍攝團隊的照顧令拍攝進度超出預期般快。「事前我哋溝通主要都係服裝方面，同埋少少節目流程上的問題。冲哥習慣去到場地先度稿，又或者佢鍾意啲free flow啲嘅嘢，鍾意啲即時啲嘅對答，我都覺得同佢夾得幾好，因為我哋都係比較即興嘅人，鍾意爆肚多啲，有時有啲頭tag都係我哋臨場爆肚，我哋未必有夾過晒，模式係夾稿同爆肚一半一半咁樣。」
而在節目中亦不乏波波與胡慧冲的互窒場面，她笑著說：「我成日都同冲哥開展活潑嘅對答，佢都有叫我大膽窒佢。其實我自己拍節目以來，初心都係希望觀眾睇得開心，或者因為我拍嘅嘢而笑吓、輕鬆吓，我已經超滿足，所以大家鍾意呢個節目，我已經有一定嘅成功感。」
相關閱讀：獎門人丨波波黃婧靈伸脷舔乒乓波吸力驚人！金剛猴擒進攻錫錯部位：成粒波都係口水
波波靚相圖集：
年僅26歲的波波，自 2021年成為無綫電視經理人合約藝人，近年參與不少綜藝節目演出。對於未來發展，波波坦言想繼續參與不同的綜藝節目：「我都好想拍多啲不同類型嘅綜藝節目，等大家可以見到不同面向嘅我，可能有時我好活潑，或者有時會好認真咁去做一樣嘢，同埋都想試吓拍吓劇。」
《冲遊泰國10》節目簡介：
「泰國通」胡慧冲帶領大家熟識的「冬蔭家族」、「泰‧爆紅」的嘉賓主持鄺玲玲以及新加入的「人氣」女神「波波」黃婧靈，繼續搜羅泰國食、買、玩的新情報。團隊率先發掘曼谷及其周邊的「泰新」酒店、商場、食肆，品嚐各式「泰美味」佳餚，探索「泰潮」景點，與貓貓遊船河、往商場拜神、「蒲」文青新天地……波波還跟胡慧冲暢遊芭堤雅，盡情解放享受驚喜行程！鄺玲玲則會教泰文兼解答有關泰國的種種問題，帶出各方面「泰實用」資訊。
《冲遊泰國》系列節目專頁：https://bitly.cx/5enwdp
