各家大型科企，包括微軟（Microsoft)、谷歌（GOOGL)、亞馬遜（Amazon，AMZN)自己研發數據中心晶片，最新消息係亞馬遜自研晶片Trainium2將會投入喺數據中心應用，集群規模10萬件晶片。相關消息令亞馬遜自研晶片嘅ASIC供應商Marvell（MRVL)上到高位，至於競爭對手、其他大型科企嘅ASIC供應商博通（Broadcom，AVGO)以及數據中心GPU龍頭英偉達（NVIDIA，NVDA)股價相對偏弱。而ASIC晶片連接方案供應商Astera Labs(ALAB)亦不斷破頂。
AI訓練用途仍為英偉達天下
自研數據中心GPU係各大科企必走之路，邏輯好簡單，英偉達GPU賺足75%毛利率，即係生產成本嘅4倍價錢向科企出售GPU，如果科企自己能夠做晶片，當然慳返唔少錢。只不過，英偉達深耕20年嘅軟件CUDA架構，訓練AI不可或缺，以及連接英偉達GPU嘅NVLink確保GPU集群嘅高運算能力，於是成本4倍嘅價錢搶購英偉達GPU仍然除笨有精。即使微軟、AMD等等共同開發UALink技術抗衡NVLink技術壟斷，但英偉達技術同專利拋離得太遠，至少數據中心GPU用喺AI訓練用途方面，未來一段時間仍然係英偉達天下。
競爭對英偉達暫不足為患
近期透過AI技術增加收入嘅企業，股份表現強勢，包括Palantir(PLTR)及AppLovin(APP)，AI晶片供應鏈股份表現較差。目前市場擔心科企投資自家晶片，未來對於英偉達GPU嘅倚賴程度減低，亦擔心2025年之後市場對於AI GPU需求放緩，亦有對華晶片制裁加碼嘅威脅，情況同一年前AMD推出AI GPU、市場憂慮英偉達受到衝擊一樣，不過，事後證明所謂競爭對英偉達暫不足為患，行業需求得以延續，股價今年再上升近兩倍。以目前逾3萬億美元市值，要英偉達再上升兩倍當然不可能，要釋除市場憂慮、股價向上就指日可待。AI概念喺此輪牛市甚至下輪牛市都係長炒長有，舊贏家運勢未完，新贏家只會不斷產生，機會只要等，就會見得到。與其相信自家晶片概念壓過英偉達，倒不如相信市場純粹輪流炒作更好。
晉佳
https://www.patreon.com/user?u=28525578
相關文章
恒指過去25年升45% 年均回報僅1.5% 林本利：盈富未能創造財富
「3%大法」推算提早退休金額 李聲揚︰有理財專家居然說2400萬元不夠用
