有高薪厚職但工作辛勞的護士港女慘變親戚人肉提款機，事主在網上大呻，在家族聚會飯局上，被叔叔當眾要求資助堂弟買樓首期。網民對此大表同情，有人好心地手把手教路，列出體面的拒絕對白。詳情見下圖及下文：
高薪護士港女慘變親戚人肉提款機 被要求資助堂弟大額買樓首期逐張睇↓↓↓↓
堂弟30歲四肢健全日日躺平打機
樓主日前在社交平台Threads以「情緒勒索」為題發帖，大呻家族聚會飯局變成「我嘅個人批鬥大會」，指「叔叔無啦啦嚟料」，話「阿Ｘ，你做護士咁辛苦，實儲到唔少錢啦，你堂弟爭7萬、8萬首期，你做家姐嘅，資助吓佢，好應該啫」。
樓主續指「我當堂O咗嘴，個腦一片空白。7萬、8萬？佢講到好似70、80蚊咁輕鬆。大佬呀，我啲錢唔係大風刮返嚟㗎！我喺醫院輪N（夜）更，日日對住啲屎尿屁同生離死別，做嘢壓力大到間唔中情緒崩潰。放假淨係攤喺張床，連街都唔想去，咁樣一蚊一蚊儲返嚟嘅血汗錢，點解要我拎去俾一個30歲、四肢健全、但日日喺屋企『躺平』打機嘅堂弟買樓？佢憑咩呀？」。
樓主繼續大呻：「我諗住點樣婉轉啲拒絕，點知我未出聲，我叔叔已經黑口黑面，開始講埋啲『你細個嗰陣我哋幾錫你』嘅廢話。
樓主補充後續發展……
最令我崩潰嘅，係我老豆同媽咪。我望住佢哋，諗住佢哋點都會幫我講句公道說話。點知，我老豆竟然話：『一場兄妹，唔好計較咁多。』」我阿媽細細聲同我講：『算啦女，唔好搞到咁肉酸，俾親戚話我哋唔識教女，好無面㗎。』」
她稱「嗰一刻，我真係覺得好委屈，好似全世界都覺得我嘅努力係理所當然，而佢嘅懶惰就需要我嚟埋單」。樓主接著網民向網民查問「我真係唔識分，究竟係我太自私，定係佢哋親情太廉價。我係咪應該為咗所謂嘅家和萬事興，就硬食呢啖氣？」。
樓主及後在回應欄補充後續發展，「然後俾老豆老母Ｘ咗一輪」、「我個時話我諗諗先，過兩日覆~啱啱whatsapp咗阿叔話我幫佢唔到了」。
相關閱讀：嫌富貴親戚奀派10蚊利是 網民感慨：冇錢人小心翼翼地大方
網民問是否真人真事 樓主咁答
不少回應的網民也感受到樓主的怒氣，幾乎同一個鼻孔般一同出氣，留言獲樓主接連現身回應：
•網民甲：今日俾得7萬、8萬。轉頭又4萬、5萬。再隔多排就10萬8萬。俾開就會焗你俾。繼續情勒你。原來咁樣做下你就會屈服科水。之後成班親戚等你養㗎啦～就算你開金礦都頂唔到呢班親戚。你父母嗰度，我係你會之後情勒返佢。我係你女呀～自己個女都唔撐唔保護。原來面子緊要過自己個女～
•樓主：嬲咗。
•網民乙：都一場親戚，梗係叫老豆老母俾啦，話晒佢哋係長輩，輪輩分排隊都未到你。呢舊錢出咗門口，倒咗落水⋯⋯父母有咁嘅思想，你都要保護自己，親戚朋友面前唔好講太多錢銀嘅嘢，錢都係留自己身邊，有咩事自己救自己 。
•樓主：佢哋可能覺得幫得就幫啦。
由於事情太離奇古怪，有網民難免質疑是否「真人真事？」，追問無啦啦叫人送錢俾佢洗同乞兒有咩分別？」；樓主回應時則強調「唔真我po（發帖）嚟博人嚟鬧我？」。
網民列得體地回應對白
因應事件，另有好心的網民細心地手把手教路，列明如何得體地回應叔叔的要求：
•簡單講句，叫佢無錢就唔好學人買樓，完。
•首先我覺得唔好俾件事影響自己心情，講得呢啲說話嘅人基本上都好無恥，錢喺你手上佢哋吹你唔脹，或者你答佢我都好想買樓，不如你資助返我幾十萬。
•有時啲嘢，聽咗咪算囉，唔駛咁認真，嗰刻敷衍佢就算。就算阿爸阿媽開聲都唔使理，錢喺你個袋又攞你唔到。不過你父母最好唔好耳仔軟。借俾佢，最後問返你攞，就慘啦。
•簡單，首先，唔使咁認真。之後就扮認真咁講：「好喎！我哋一於搞個家族基金，我夾8皮。嗱，我都8皮，你地俾我高一輩，又咁錫我，起碼夾一球啦。打鐵趁然，聽日上律師樓搞好無？」佢唔收皮就奇！
•直接答：「無」，就可以了 。對方若再問，你就答：「我無欠你 。」父母若再加把咀，你就答：「不如阿爸／阿媽自己出錢幫吓人。何必慷人之慨，更何況係我啲血汗錢。」*記住要無尾音咁講完，講多幾次，佢哋就唔會再問㗎嘞 。
•以後有呢啲親友聚會，少出現或去街避一避，他們見少了你，會知道你唔太喜歡跟他們接觸，就知他們不受你歡迎！另外，可以跟父母家人說，細佬無多啲嘅錢，真係唔好買樓住，依家大市不睇好，如果到時供唔起，又邊個幫到佢！自己也想置業，儲緊錢！
•最大體回答梗係答佢「無問題」。但係，要接住去開條件：「嗱，阿叔，我日日返通宵都唔簡單，你資助我買車，我資助返表弟，我啱啱睇咗部電車，仲未買，你資助我20%啦，都係十零萬」。咁佢就會去到兩難，將佢令你嘅尷尬，自己尷咗先，就算佢應承咗，你都有賺。
另有網民經歷了與樓主相類似的苦況：
•請你堅持自己原則：不想借錢就不借…也不用聽親戚閒言閒語！3年前，我親戚移民賣樓，地產公司話用450萬買，佢開到550萬……（2012年入市約250萬）……拖了1年，無人買……我阿媽叫我買親戚層樓……當然我要高價買…我斷然拒絕。最後親戚已移英，為了避免高稅，終於在移英1年內350萬售出。
•N（好多）年前我一向同我親生家姐去旅行，仲要次次都係我俾，有一次我返兩份工，一日瞓2小時，同朋友去個韓國旅行，我媽同我表姐話：點解今次唔預家姐去？我話：我憑自己努力得番嚟，佢要去可以呀！自己賺錢，一係唔介意嘅你哋俾錢佢去囉！之後兩個即刻收聲。我細個俾人恰得多咩都啞忍，到搬出來住，受咗好多委屈先識保護番自己，你太善良了。
資料來源：kiss_tszching＠Threads
相關閱讀：親戚飯局唔想奉旨找數 改行AA制有阻力？ 網民講解聚會埋單潛規則↓↓↓↓
農曆新年親戚聚頭機會頻繁。有網民2024年初發出一個家庭之間常常卡在喉嚨卻又不好意思宣諸於口的靈魂提問：「有時同親戚食飯，發現佢哋唔會AA制（平均分擔所需費用）？」。
回應的網民對此抱不同見解，有人乘機講解聚會埋單潛規則、有人自爆家規發表意見、有人認為親戚飯局AA制的最大阻力是來自……↓↓↓↓
