李駿傑（Jeremy）今日（24日）在將軍澳舉行首次舉行個人簽唱會，吸引數百Unicornsss（粉絲暱稱）到場支持。Jeremy除了跳唱外也有跟粉絲玩「心有靈犀」動作及估歌仔遊戲。提到新碟，Jeremy指當中的《不枉我們一起過》非自己擅長風格，故要揣摩如何唱，認有點難，又指9月的音樂會有驚喜，也準備新歌中。
Jeremy出門招風雨
Jeremy坦言上次簽唱會遇上十號風球延期，今日又有打風，笑指自己去旅行也會遇上暴雨和打風。早前Jeremy跟Anson Lo（盧瀚霆）到大阪旅行，他指此行去了5天，提到Anson Lo「移情別戀」Edan（呂爵安），Jeremy笑說：「咁咪同佢爭囉，AL都係我Best Friend！雖然呂爵安都係，（你同AL去旅行爭贏咗？）係，沾沾（自喜）添！AL去旅行同我去㗎！」他指，其實也有叫呂爵安一起，惟對方要開騷只能再約，稱大家很難夾時間。至於呂爵安曾表示壓力大，經常打電話給AL訴苦又喊，Jeremy指呂爵安在他面前好少喊，兩人不開心時也會上對方的家傾偈，做GYM就會分享近況，「而家大家都多個人工作，要靠呢啲時間去update。（有冇為感情事訴苦？）咁又冇，（佢感情順風順水？）關於佢感情，其實我唔係知好多，我都唔知點樣答大家，（林明禎同呂媽媽去睇Edan演唱會）我唔知喎，我睇第一場。」
Jeremy踏入3字頭好驚
提到AL跟呂爵安感情要好，問Jeremy是否呷醋？他說：「睇吓呂爵安點補償我！講笑啫，做嘉賓呢啲嘢，個Show係佢嘅，請咩人做嘉賓係佢決定，唔應該care我同你friend你一定要請我去，呢個係唔啱嘅諗法。」Stanley（邱士縉）早前生日，Jeremy有約對方食飯慶祝，笑言對方生日反而請了他食兩次飯。至於下月8日Jeremy將會30歲生日，他表示踏入3字頭好驚，到時會與朋友跟家人食飯，也會搞生日會，亦已跟「MIRROR生日小組」約食飯，暫時未知誰會出席。至於生日願望，他表示希望在9月3、4日的音樂會順利，笑言生日禮物想買張機票去希臘旅行。提到魯庭暉離任MakerVille後，其職位由金廣誠接棒，Jeremy指以前已經常接觸這名「長官」，故對於自己來說沒太大變化，又透露也有跟對方開會，提出建議。問到那麼喜歡去旅行的他，是否想拍旅遊節目？Jeremy即笑指怕觀眾眾悶死，「冇嗰份自信，可以試吓嘅，可能好好睇呢，逼自己成長！」另外10月他跟Anson Lo、呂爵安及姜濤再衝出香港，一起到泰國演出。
Jeremy唔敢揸車載隊友
早前姜濤在演出時跳唱他的《半》，Jeremy指當日有看直播，戥對方緊張：「佢做得好好，我都好感動，佢將一個咁大咁好嘅舞台分享畀我哋，用我哋嘅歌去做表演！」提到林建明早前在訪問中指，得知姜濤因為身體狀況2或食藥而影響身形，Jeremy就表示不清楚，也覺得對方瘦了不少，指姜濤很自律和勤力食健康餐，又做運動減肥。《東周刊》早前爆姜濤以旅行散心，打波及遊車河3招減壓，他笑言夠膽坐對方車，「我試過坐呂爵安車，係有少少驚。如果我揸佢哋會仲驚，因為我好耐冇揸車。」
