10月18日，大致多雲，初時有一兩陣驟雨，日間短暫時間有陽光。台積電業績超預期，其ADR股價業績後急升，帶動晶片股回勇，美股周四則個別發展，道指跟標指破頂，道指再創收市新高，但標指則回軟，收市微跌；納指則於收市幾乎蒸發全部升幅。道指報收43239，升161點或0.37%；標指倒跌1點或0.02%，報5841；納指僅升6點或0.04%，報18373。
Netflix周四收市後公布業績，股價回落2%，但自2022年5月低位已勁彈近340%，不過業績公布後，盤後股價急升逾半成，又係業績理想帶動股價回勇。Alphabet股價跌1.4%。台積電美國ADR股價抽高9.8%，創歷史收市新高，盤中曾破頂高見212.6美元；其他半導體股跟隨向上，Nvidia一度升3.8%，收市仍漲0.9%，其市值已超越股神巴菲特旗艦巴郡，ARM、博通及美光科技升幅則介乎1.4%至2.7%。
美股升勢有望持續到年底
高盛交易部門的環球市場董事總經理Scott Rubner認為，美股升勢有望持續到年底，據統計顯示，自1928年以來，標指喺10月15日至12月31日期間，升幅中位數為5.17%，大選年嘅升幅中位數更超過7%，意味標指可能於年底前升抵6270。
美國隔晚公布唔少數據。美國勞工部公布，截至10月12日止一周嘅首次申領失業救濟人數意外減少1.9萬人，至24.1萬人，較預期的25.9萬人為低。分析指出，美國東南部州份之前受颶風吹襲，未來數周嘅申領救濟金人數可能會波動；截至10月5日止一周持續申領失業救濟人數則增加5000人，達到186.7萬人，略多過預期嘅186.5萬人。美國商務部公布，9月份零售銷售增速加快至0.4%，優於預期嘅0.3%，期內扣除汽車及汽油銷售增加達0.7%，遠勝預期僅增0.3%。至於9月份工業生產減少0.3%，跌幅大過預期嘅0.2%。由於近日數據反映短期未有再大幅減息嘅逼切性，美元近日回升，美滙指數一度漲0.27%，至103.874。日圓跌0.45%，兌每美元低見150.32，係自8月1日以來首次再重返150關。美國10年期債息最多回升8.6個基點，至4.102厘，對息口較敏感嘅2年期債息漲7.9個基點，報4.014厘。
西升東降情況再現
至於港股喺美股做好下，表現憔悴，雖然昨日港股早段曾反彈近500點，恒指曾高見20783水平，可惜午後由升轉跌，一度下跌309點低見19977點，收市跌幅略為收窄至207點，險守二萬關，收20079，已連續第四日下跌。成交縮減至1912億元，反映跌市未見有大量資金於現水平撈貨，大市或仍有機會向下尋找支持。噚日大市由高位回落，午後急跌原因，主要係住建部及人行等部門嘅發布會了無新意，市場認為目前嘅內救市力度不足，內房股午後跌勢加劇。
雖然內地今次推組合拳救市決心係有，可惜遲遲未見有具體數字及時間表，令大市蒙上陰影。重點係國慶假期期間，於22000至23000水平追貨資金被套死，市場又消耗一批購買力，近日成交開始縮減，反映再未有新資金入場，喺獲利及止蝕盤湧現下，加劇大市跌勢。不過筆者又未至於極度悲觀，大市由高位已回吐一半升幅，技術走勢上，如回補19954至20268嘅上升裂口，或能於二萬大關喘定。不過回補裂口後，若再失裂口底部，則有機會繼續向下尋找支持，首個支持將會係5月高位約19700水平，而較大支持為今次升浪回調黃金比0.618，即19300至19400水平。留意今日內地將公布一系列經濟數據，包括第三季GDP，大市或再隨A股波動。觀乎美股近日屢創新高，但港股跟A股則由高位回落，並於短時間內出現極大回吐幅度，急升急跌走勢令人吃不消，西升東降情況再現，中港股市表現令人失望，難怪年表一代股民，移情別戀美股後，對中港股市頭也不回。
古天后
