「億萬駙馬」伍富橋老婆梁兆楹（Shirley）處女下海，為HOY TV飲食節目《開飯啦》炮製賀年菜，日前Shirley為茹素的七師傅(七仙羽)煮幾味素菜，食到舔舔脷的七師傅對伍太讚口不絕，強調Shirley不止學歷高，條件又好，不認同外間批評她的樣貌，七師傅力撐：「我反而欣賞佢唔整容冇膠面，有啲似楊貴妃！」 採訪：方騫平
由金牌監製張志明統領、準人妻黃靜藍（藍藍）主持的《開飯啦》，逢周一至五晚8點半於HOY TV播出，當日「人妻廚神」Shirley為嘉賓七師傅炮製零失敗蔥油餅配八寶辣醬、潮式蘿蔔素肉煲仔飯、桂花糯米藕，色香味俱全。七師傅大讚Shirley的手勢不是機械化而係有家的味道，比5星級酒店更好食；Shirley謙稱：「我唔算係高手，只不過以前喺外國求學時有鑽研廚藝，平日會喺屋企試做撞下，偏向簡易『手殘』都可以做到嗰種。」她又透露老公生食嘢好簡單，最愛食雞、魚及蔬菜，來來去去喺呢幾樣基礎上變出花款。Shirley又情不自禁放閃「就算有幾唔好食，老公都要話好食，佢係一位唔中肯嘅試食者。」
欣賞零毛孔冇膠面
七師傅勁讚Shirley條件好好，她搞笑說：「佢既會煮食，學歷高，而且皮膚好又靚女，兼且有家底…係男人都會娶佢。我反而好留意Shirley個樣，傳說佢好唔靚，呢件事令我嬲咗365天零一秒，佢零毛孔，皮膚彈手又靚，而且眼睛圓大，輪廓分明，牙齒又白…我欣賞佢唔整容冇膠面，有啲似楊貴妃。」Shirley大笑回應：「老公都咁講。」七師傅更指，外間要評論Shirley身材睇下用咩角度：「如果果用放大鏡一定會肥；如果喺月球、喺喜瑪拉雅山影過嚟，佢肥唔肥呀？」
七師傅更指Shirley和伍富橋是真愛，她笑住爆：「我同Shirley一樣咁有錢，以前佢哋仲未結婚時，飯局上伍富橋唔會望我一眼，每次見到佢都係含情脈脈望住Shirley，兩人好恩愛，唔會受外界任偷何抨擊影響到感情。」
