MIRROR 成員姜濤、Edan （呂爵安）、Jer (柳應廷) Tiger (邱傲然) 昨晚（年初九）合體跟MIRO們一齊開zoom 賀蛇年，而剛剛榮升做P牌仔的姜濤，在直播中亦有提到學車點滴，更自爆考到車牌後即睇法拉利。
Edan笑稱點會唔記得姜濤
《星島頭條》前天（5日） 獨家直擊姜濤考車牌，極有天份的他成功一take pass，昨天姜濤在直播中就與幾位隊友分享點滴。姜濤透露大概上了十多二十堂才去考試，Tiger 就搞笑問姜濤覺得考官有否認出他的身份，Edan 即謂：「點會唔認得佢，有邊個唔認得姜濤？」Tiger又謂：「可能好早 ，佢未瞓醒」而姜濤就笑笑口表示：「我考之前已經有考官喺度討論我係邊一日嚟考試，我估你哋應該都係。」他續指：「我都話如果我唔一take pass，你哋兩個都係一take pass，我好樣衰。」
姜濤自爆睇法拉利
Edan 再追問姜濤：「有冇鍾意咗揸車，因為我記得你去學嘅時候，你係話其實冇乜興趣揸車。」姜濤就表示：「本身考之前（pass之前），係覺得未必會買車嘅，但考到之後…（Tiger : 可能佢已經買咗）唔係咁又冇，但係當有咗車牌之後就好似想買。」而剛考到P牌仔僅一日的姜濤更自爆有睇法拉利，「我係有睇法拉利嘅，因為我好奇，我以前冇關心啲車，咁我就去睇，法拉利係幾多錢呀？有啲咩又係幾錢呀？」
193被4子串爆：揸法拉利嘅時候小心
說到法拉利， 郭嘉駿（193）躺着也中搶，由於193去年曾駕著法拉利倒車時撞到途人，向來搞笑擔當的Edan立即提醒姜濤笑謂：「揸法拉利嘅時候小心啲囉，特別係倒後嘅時候！」姜濤即向着鏡頭說：「佢哋呀，唔關我事呀193」其後，四子再即場示範影硬照時，超近距離面對面的場景，姜濤更差點錫到 Jer 的面頰，相當搞笑，現場氣氛非常熱鬧。
