有無殼蝸牛向網民請教「35歲前置業到底點做到？」，不少業主網民熱心留言分享自己艱難的上車心得，瘋狂返工只是其中之一，其間有人提到一件令人佩服的買樓事件，指有同事當年俾$500落訂，即買到地鐵上蓋物業。詳情見下圖及下文：
35歲前置業到底點做到？ 業主網民分享心得 有人俾$500落訂買地鐵上蓋樓逐張睇↓↓↓↓
樓主昨日（4日）在社交平台Threads直截了當發帖，向網民發問「好想問下35歲以下已經擁有自己一間屋嘅人，你哋到底係點做到！？ ？？」。樓主續指「可唔可以老老實實分享分享？我想知點解自己咁垃圾，連一個月拎1萬蚊租屋都冇膽，但人哋已經做埋業主」。
相關閱讀：$500萬買200呎單位 供樓供到80歲 單身中女因一淒涼理由置業 網民心酸
90後業主們暢談上車之路
35歲是1990年出生，樓主詢問的是90後業主們。回應的網民倒真是掏心掏肺地講自己、又或是身邊人的年輕上車之路：
•網民A：做生意，瘋狂返工，返到連假都唔放，一星期7日都係返工，就算夜晚返到屋企都係繼續做嘢，做到凌晨，傾公司嘢傾到天光，第二日都係照常返工，早幾年抽居屋，第一次抽就中。
•網民B：我買第一層樓係23歲，仲要係失婚拖住兩個小朋友，那段日子到小朋友成年之前，除了返工就是返工，再之後嗰10年，報復式旅行（一年5至10次），其實做唔做到都係睇你夠唔夠決心。總結嚟講，如果冇父母幫手，只能夠努力工作，努力慳錢。（31歲換樓、其後買過的士、再繼續買樓賣樓，到依家繼續努力工作同努力去旅行）。
•網民C：老老實實答你，無任何父母幹，我哋兩個27、29歲各買一間收租樓。簡單嚟講係要取捨，人哋去玩去嘆世界嘅時候，我哋返parttime（兼職）儲錢，再慢慢自己做穩陣投資滾大嚿錢，當中係包含好多辛酸同心血。創業嗰時係好多時唔瞓、生意好又要好天收埋落雨柴，亦都要不時覆盤與時俱進先長做長有唔怕被社會淘汰。
•網民D：24歲畢業第一份工1.3萬元，半年跳朋友間公司1.7萬元，再過年半搵咗份2.5萬元。返工其間做埋pt（兼職）有3萬，每月俾5000元屋企，之後加到連pt當3萬5，自己死慳爛慳。放假一pt無論咩都照返，28歲唔夠儲咗80萬元，買咗層400幾呎舊樓，300萬元，行8分鐘到新界某西鐵站，40萬元首期入得去住。25萬元裝修，宜家供萬1蚊，搵緊5萬、6萬其實唔難，睇你有無心。
•網民E：其實有數可以計，係絕對可以做到。假設畢業23歲開始出嚟做嘢，由月入$16000，每月儲$5000，1年儲$6萬，10年$60萬，都係33歲，買樓花俾一成首期，銀行樓按七成，兩成發展商，仲可以揀供30年，10年人工都會加啲。
•網民F：我分享我同事嘅勁嘢。佢而家應該都係35歲咁上下，做秘書仔人開頭1萬蚊，佢一出嚟做嘢就好慳，2008年股市跌到好甘，20幾歲嘅佢儲咗啲錢，當年銀行壓力測試無咁嚴，佢俾500蚊同業主落咁個訂金就買咗地鐵上蓋樓。
跟著10年都租出去cover（遮蓋）返個供樓，而家收返嚟住用咗50萬裝修，跟著都差唔多可以屬返層樓啦。不過佢話20幾歲嘅時候真係慳到連屋企人都叫佢唔好咁樣，但佢話個陣睇錢好重，有錢比一切都開心，而家完全有自己層樓就識享受。
佢真係我真心佩服，雖然佢知如果自己搞唔掂屋企人都會幫，但最尾都靠自己搞店咗，仲有錢去幫細佬創業。大家都係打工仔搵萬零2萬，佢提早完成咗個task（工作），我細個淨食買嘢去旅行亂fing（洗）。
•網民G：買屋係天時地利人和。20年前25歲，開始月供基金儲錢，點知金融風暴，鎖死20年，無咗25%。後來竟然意外地認識了理財顧問，建議我取消戶口轉另一個計劃，可以自由取錢，果斷轉會。適逢薪金增多，儲款加碼。
•網民H：34歲開始睇樓，主力選九龍灣大型屋苑，期間樓價狂升，升到改選更實惠但交通略不便的屋苑。然後，睇中咗的樓竟然業主突然決定唔賣。。。經紀將未公開的靚盤介紹俾我哋，好正。
•網民I：35歲從戶口取出首期金額，加上老公的薪金通過抗壓測試，成功做業主。層樓試過升到過40%，依家又跌返晒，好彩供咗一半無負資產。
•網民J：當你30歲月入中位數3萬元，兩公婆都6萬元，月儲2萬元唔係好過份。3年應該儲到72萬元，400萬元樓儲40萬元連雜費裝修當70萬元，月供$1.5萬其實真係好輕鬆。仲有錢去旅行，當然你話又要地鐵上蓋又要新樓就咁無計，人無錢就無咁多選擇。
•網民K：我33歲買樓，所有錢自己俾，之前一直都係住娘家（有俾家用），本身唔好名牌，除咗保險無咩大錢要駛，每年有去旅行但唔係5、6次咁多，所以易啲剩錢。
•網民L：我當時係27歲咗右已經做到，當然一開始係同屋企人聯名買樓花，跟住樓市升得好快，半年後收樓，屋企人就同我講不如賣咗佢，分錢之後叫我自己獨立買一間收租當供樓，自己當時就同阿爸阿媽住啦！ 講真，嗰半年時間係我呢一生人最慳最慳嘅時間，又要供半份樓又要俾家用，返工帶飯，夜晚上完堂都拿拿聲返屋企食飯，因為要慳錢，但係呢個回憶好深刻。
•網民M：90後，身邊嘅朋友早幾年置業 99%都係以下情況：1. 父母幹、2. 同另一半夾份、3. 讀書好叻一畢業做專科 （月收入起碼5萬蚊以上）、4. 同兄弟姊妹夾份。
•網民N：一係就人工好高，一係就好早結婚兩個人供，一係就屋企人有，黐住屋企住冇負擔嘅，自己唔去玩又唔使錢，咁咪可以供樓。十幾20年前買嗰啲樓都賺咗錢啦。
•網民O：24歲，日打3份工，日做17個鐘，儲5年錢，29歲終於買到。
•網民P：第一份工做銀行3萬月薪，買下股票，補下習好快買第一層樓。
•網民Q：我係35歲以下，買咗樓兩年，當年辛苦地儲個首期，之後就慢慢供。
•網民R：啱啱出嚟做嘢，有入息證明，屋企俾六成首期，就擁有第一間屋。
相關閱讀：22歲港女何文田買1千萬樓 隱形富二代「一原因」拒靠父蔭：「我仍要孭15年房貸！」
網民：90後唔細㗎喇 有樓唔出奇
有網民則為「90後唔細㗎喇，有樓唔出奇，爭在咩樓，有豪宅個啲先係例外」。另有人稱「睇完上面嘅成功例子，全部前提係住屋企儲錢。我18歲就搬出嚟住，交完租都所淨無幾，冇買到樓，但係好自由」。
網民提醒：唔好同人比較
還有人提醒樓主：
•唔好同人比較，無意義的。
•人比人比死人。唔好同啲勁人比，因為佢哋嘅運氣指數、家底資源都同你好唔同！反而我覺得你應該提升自己技能同技術，做到專一極致，提升自己喺嗰個行業嘅競爭能力去到佼佼者嘅程度，錢銀就可以滾滾而來！限定自己在35歲之前就需要置業，呢一個係一個思維嘅框架，希望你唔好局限咗自己，可能你在35歲之後買嘅樓比人哋仲平仲抵仲大呢！
•如果要認真講嘅話係努力增加自己嘅主要收入，確認自己嘅行業係可以比你用努力換取更加金錢。 之後就係一個切實執行嘅儲蓄計劃，再跟住就係第一間屋唔好諗住一下就要最好，係有限範圍內負擔到就可以去馬。
接著有網民精警地分析：「佢哋最年輕有力嘅時間乜都唔玩、唔用、唔食，換一個幾百尺單位返嚟。你喺年輕最活力嘅時燃燒自己嘅生命活在當下，未來無人話得埋，但兩邊生活不應比較，正如你嘅能力係月入7萬、8萬，但你唔買屋選擇享受。一年收入係人哋嘅3倍，佢哋月入永遠不過三兩萬，選擇死慳死抵首付買樓後供多30年至退休仍然係3萬」。
資料來源：colojsk_o＠Threads
相關閱讀：930萬首期6成按揭 豪宅男盤點「十年樓奴」成績嘆悲慘：「好似供咗一場空！」↓↓↓↓
有港男十年前付930萬元首期買豪宅，他做六成按揭加發展商2按，今年中，他盤點當了「十年豪宅樓奴」的成績，數據公開後掀起網民熱議，他自嘆：「悲慘嘅地方就係，十年過去，好似供咗一場空咁。」但就表示買樓仍有優勝之處。事主公開十年內各項供款明細，與及相關資金的可能投資收益等數據，細節如下↓↓↓↓
