夏韶聲（Danny Summer）早前3月6及7日與有「鋼琴詩人」之稱的意大利著名鋼琴家Danilo Rea，舉行一連兩場的《Danilo & Danny“Storytellers”音樂會》，兩位分別在華語與古典爵士樂壇深耕數10年的巨匠，這場橫跨海洋與世代的音樂邂逅，亦成為「荃灣有爵樂」（Jazz in the Neighbourhood，簡稱JITN）與荃灣大會堂的場地夥伴計劃4年來最終一項表演項目。
夏韶聲「無家可歸」住酒店？
「荃灣有爵樂」是一個在香港荃灣區推廣爵士音樂的社區項目，由香港爵士樂團體「爵士世界（香港）有限公司」（Jazz World）及「起樂有限公司」籌辦，在2022年至2026年更成荃灣大會堂的場地夥伴。雖然場地夥伴計劃在3月31日剛結束，但「荃灣有爵樂」卻絕不言休，將會以另一種形式跟廣大樂迷見面。正如Jazz World創辦人張景謙（Clarence）形容「只是暫時無家可歸」，但夏韶聲很有信心說：「暫時啫！無家可以住酒店，五星酒店住唔到，四星都住住先。」而最新項目就是由Jazz World及法國五月節製作，5月1日由「韓國爵士天后」羅玧宣與法國傳奇鋼琴家Bojan Z於香港大會堂舉行《羅玧宣 x Bojan Z爵樂香頌》。
夏韶聲想當年
夏韶聲算是跟「荃灣有爵樂」和Jazz World合作最多的香港歌手，包括2022年開幕重頭戲《夏韶聲諳1重聚音樂會》、2024年《Danny Summer & The Legacy Band音樂會》及2026年剛舉行的《Danilo & Danny“Storytellers”音樂會》，他與創辦人張景謙甚有淵源，早於1985年便在唱片《I Remember》上合作，張景謙憶述：「當時係Tommy（著名音樂監製谷中仁）話中文歌賣得，佢認識夏韶聲，夏韶聲想找人出唱片，問我有冇興趣？」兩人因而認識並合力製作專輯《I Remember》，夏韶聲說：「我跟Clarence當時唔知道《I Remember》呢張唱片會成為經典，碟內還收錄咗我第一首歌《童年時》，呢首歌攞過獎，到現在大家都覺得好聽，放落我哋第一張合作嘅唱片係應該嘅。」
受疫情拖累
談到兩人在《夏韶聲諳1重聚音樂會》中再合作，張景謙解釋原來跟意大利著名鋼琴家Danilo Rea有關，「疫情前我已想找Danny跟Danilo Rea同台，後來因疫情擱置咗，有一日靈機一觸，既然Danilo嚟唔到，我同Danny又啱啱錄完《諳1》，但『諳Band』仲未做過音樂會，於是成就咗《夏韶聲諳1重聚音樂會》。」夏韶聲再補充：「當時要考慮票房，我哋都唔知會唔會爆，但呢個係好好嘅idea，搵返成團已久嘅原班人馬，連Engineer都係原班，現場重現呢隻專輯裏面嘅歌。」「諳」樂隊後來加入Cy Leo、Carpio brothers等香港樂壇頂流樂手，更改名「Legacy Band」，夏韶聲形容這隊並非普通樂隊，「佢哋本身每個都獨當一面，係全港唔同範疇嘅頂級樂手，所以我哋冇Band Leader，為嘅係等觀眾睇到高手做Live。」
結束即開始
至於Jazz World與荃灣大會堂的「場地夥伴計劃」結束，夏韶聲認為仍可展望將來，「Jazz World喺荃灣大會堂嘅合約今年完，但唔表示Jazz World完，因為Jazz World就係集合呢啲音樂人，我跟粉絲講過香港如果冇Jazz World，有很多高手同好嘅音樂，大家可能會冇緣分睇到。」張景謙最開心自己能為音樂界出力，「有好多機會畀本地樂手同Artist跟外國樂手合作，大家互相欣賞。」夏韶聲認同表示：「因為Jazz World，我搵咗日本鼓手川口千里嚟演出我嘅《Last Summer演唱會》，都係經Clarence嘅Jazz World做橋樑。呢幾年，樂手同擁躉都知道Jazz World好似變成一個總部，一『吹雞』就會有一班高質素嘅音樂人嚟做Show，唔係好嘢佢哋唔會介紹。」
