呂爵安（Edan）一連三場的演唱會《EDAN LUI『e to E』 LIVE 2025》昨晚（17日）來到第二場，除邀請了「五膠」，更請來好兄弟兼MIRROR隊友Anson Lo（盧瀚霆）作嘉賓，「登神」再次合體，在台上的情深對話非常感人。
Edan︰Anson Lo喺我人生佔重要地位
Edan坦言Anson Lo在他人生中佔一個好重要的地位，所以很想與他分享這個舞台。Anson Lo甫出場全場立即起哄，「登神」再次合體，先後合唱了港版《社內相親》主題曲《我與你的差距》，以及港版《大叔的愛》主題曲《突如其來的心跳感覺》，二人更多次情深肉緊擁抱。Edan透露今次邀請Anson Lo做嘉賓的原因︰「都好少可以同你有個stage，唔知幾時會再有咁嘅機會，咁啱今次自己演唱會可以自己話事，就想珍惜呢個機會，唔知未來咩情況。」他續展開情深對話，指過去一年發生了很多事，並公開感激Anson Lo一直在身邊支持，「真係好想特別多謝你，過去一年發生好多事，你一直喺身邊陪住我、支持我，我好感恩入MIRROR識到你。老實講，問我Best Friend一定係你，因為我哋真係乜都會講，乜都會分享，好感恩識到你，好開心有你呢個朋友，多謝。」Edan的一番話令全場起哄。
Anson Lo亦表示今年是見證Edan最大轉變的一年，更透露見Edan喊過幾次，「我識你七至八年，今年係你對住我Show得最多軟弱、唔開心嘅時候。今年見你喊過幾次，唔係我向來認識嘅你，所以我覺得今年係你好需要我喺側邊陪伴你嘅一年。」Anson Lo表示覺得與Edan的身份調轉了，「出道頭5年，通常係我唔開心、我喊得多，會無啦啦call你叫你出嚟，今年feel到你好大壓，好多時都處於一個50/50嘅狀態。」他以自己的歌名笑指Edan 「你都有今日啦！」 説畢，兩人哈哈大笑，再次緊緊相擁。
Anson Lo擔當Edan最強後盾
Anson Lo續鼓勵Edan ：「其實你係堅強過你自己諗嘅，好多時你唔相信自己，覺得唔deserve大家嘅愛嘅時候，其實我相信在座所有人都可以證明畀你睇，你係值得大家嘅愛戴。」Edan再次感激Anson Lo ，說出「愛的宣言」：「我哋應該會喺一生嘅好朋友，相信我哋係可以一路做對方嘅best friend，所以今次都好想同你分享呢個舞台 ，Thank you bro ！」Anson Lo其後再獨唱一首《你都有今日》，並再次大讚Edan ：「今年嘅呂爵安佢真係大個、成熟咗好多，好多人覺得佢同以前唔同咗，但其實佢都係一個好鍾意唱歌、彈琴，同表演嘅一個好簡單男仔 ，所以希望大家畀多啲鼓勵呂爵安。」「登神」台上的一番真誠對話，令全場都非常感動。騷後，Anson Lo亦在社交網貼文表示：「從前你照顧我多，現在請你放心去衝，把你的煩惱和重擔都放在我身上吧，要相信自己你是值得的My best friend for life。」
