馬海倫（Helen）在娛樂圈中被譽為隱形富婆，其中一個原因固然是因為她的丈夫是來自大家族的何世堯，大兒子是眼科醫生何存廣，小女兒則是建築師何敏晴，而新抱則是銀行家葉迪奇的女兒。馬海倫過去甚少提及其家庭，今次她接受《星島頭條》訪問，細說與丈夫何世堯的愛情故事，又分享處理婆媳關係的經驗。而馬海倫亦不忌諱提及生死，她笑言與99歲的母親早已達成共識，一旦晚年身體出問題都拒絕插喉，直言：「我唔插喉唔會用心壓泵個心臟，到咁上下年紀骨頭脆，上天安排好晒，要走就走啦。」
馬海倫家庭第一
女人嫁得好，好比事業跑第一！在家庭與事業中，馬海倫從來都選擇家庭。她說：「我都係屋企先，然後先至係做嘢，小朋友大咗，個仔去咗英國讀書，個女入咗小學，我咪返出嚟（工作）囉！你年紀大，尤其我哋呢行一定有高低，冇可能停留，有幾多個汪明荃吖！」
相關閱讀：73歲娛圈富婆馬海倫施髮術年輕廿載 演技獲TVB肯定上月底成功續約
馬海倫專訪相：
馬海倫保齡球場邂逅丈夫
現年76歲的馬海倫依舊漂亮，年輕時更是人比花嬌。她指，與丈夫何世堯於南華會打保齡球時邂逅，兩人有共同興趣和話題，「我自己同車菊紅有隊球隊，佢哋姓何Ho’s family又有隊波，咁打南華會周年大賽，好多時我哋都出線，都係打保齡認識。」她指與丈夫由相識到交往，從來沒說「邊個追邊個」，「保齡球場一齊打波，打完波一齊食嘢，或者約早啲打波前食嘢！」
相關閱讀：73歲富婆甘草提前一年Fit爆備戰渣馬 上月超越周潤發成最年長參賽藝人
馬海倫愛運動保養得宜：
馬海倫與丈夫何世堯一拍即合
馬海倫與丈夫何世堯可謂一拍即合，當問到何世堯如何向她求婚時，她鬼馬地說：「佢好似話『結婚吖！』冇而家嗰啲點樣求婚㗎，安排啲乜，冇㗎！」馬海倫指，當時的她認為自己已到適婚年齡，加上當年發生李小龍身亡意外後，她感到人生無常，於是便答應與何世堯結婚。她解釋指，當年拍戲時李小龍剛好於格籬廠拍攝《死亡遊戲》，幾乎每天見面甚至會聊天，李小龍的猝逝，令馬海倫體會到人生無常，更珍惜當下。
相關閱讀：國家隊訪港丨73歲TVB富婆被馬龍迷倒！為見偶像「轉行」做工作人員 合照變少女
馬海倫有個猛料丈夫：
馬海倫產子經歷21小時痛楚
馬海倫於1974年與何世堯正式結為夫婦，翌年便誕下長子何存廣。她說：「我生第一個仔痛咗21個鐘頭，生唔到呀！因為舊時啲老人家話，順產可以生多幾個，開刀就生兩個，我奶奶話痛好快，我痛咗21個鐘開始唔得，啲胎水轉晒色，醫生話應該要開刀，開刀生咗我個大肥仔出嚟，8磅幾成9磅，嗰時唔知咁重，唔似得而家咁照得到。」馬海倫指，因為誕子時經歷十級痛楚，所以她家中，每年自己或子女生日都不會大肆慶祝，反而會茹素，全家人祝願「媽媽」身體健康。
馬海倫誕細女後爆喊：佢得7磅幾
誕下大兒子7年後，馬海倫再懷小女兒，她笑言自己當時一肚痛便開刀，不再順產。她說：「我驚又痛廿幾個鐘，又生唔到，咪好大件事！生完個仔好快瘦返，生個女時年紀又大咗，差唔多30歲，姑娘話個女好得意，好多頭髮，我以為毛鬙鬙，我麻醉咗，聽到七磅鬆啲，我喊喎！佢哋以為我傷口痛，其實唔係，因為覺得個女得7磅幾，自己咪好肥，哈哈！」馬海倫笑指，她在誕小女兒時體重150多磅，比第一胎時輕了十磅，但誕女一個月後身形暴脹，做產檢時更被誤以為未「卸貨」。
相關閱讀：TVB隱形富婆晒與視后陳年合照！華麗私伙造型掀熱議 傳身家半億老公勁猛料
馬海倫分享婆媳相處之道
馬海倫一家和睦，甚至從來沒有婆媳糾紛，兒子及新抱更不時贈送Hermès包包給她。到底婆媳關係該如何處理？她笑說：「我哋有樣好，係唔一齊住，只係住樓上樓下，每星期最少一次一齊食飯，食完飯各自返屋企，大家唔同住就減少咗好多磨擦。你同個女磨擦完，嗌完交好快冇事，但新抱始終有少少隔膜，所以唔同住就唔會有呢個機會發生。」而馬海倫與大兒子何存廣及小女兒何敏晴各自住一個單位，大兒子首次置業時也是她與丈夫幫他一把，「Daddy幫手嘅，但叫佢供，佢知道要供樓，咪勤力做嘢囉！有個責任喺度嘛！」
相關閱讀：馬海倫低調富婆身家半億最愛Hermès一個叫價六位數 百萬行頭過節
馬海倫每日探望99歲媽媽
馬海倫重視家庭，除了自身家庭之外，還相當疼錫現時住在護老院、99歲的媽媽，每天餵她喝牛奶、吃餅乾，兩母女感情非常好。「護老院設備好啲，屋企沖涼好驚跌呀！嗰度有專門嘅護士幫佢沖涼、洗頭，打理得好好，工人每日早上去到，到晚上離開，我唔使返工，朝早10點半一定車佢去，我餵媽媽食嘢，佢瞓晏覺我就走。媽媽晏晝瞓醒覺就工人畀下午茶佢，佢而家啲牙唔好，要打碎食。」
馬海倫與母達共識拒絕插喉
雖然馬媽媽年屆99歲，但馬海倫與媽媽都已達成共識，即使兩人日後身體狀況危急都拒絕插喉。「我唔插喉，唔會用心壓泵個心臟，到咁上下年紀骨頭好脆，泵完之後可能啲骨裂晒，裂咗好痛，冇得醫㗎！長期食止痛藥都唔好，要慢慢等佢生番埋，你插咗喉冇得吞，你食嘢都冇味道，一個月換一次，姑娘、醫生手勢好就唔痛，如果唔係會好痛㗎！咩都冇感覺，出街又唔得，何必呢！上天安排好晒，要走就走啦！」
相關閱讀：「御用惡母」馬海倫孭Hermès戴名錶遊廣東 傳坐擁逾半億身家 曾贏得選美冠軍
馬海倫拒認娛圈富婆
訪問期間，記者曾稱呼馬海倫為「娛圈富婆」，七十多歲的她反應極快地說：「人哋話吖嘛！你哋成日話，我冇認過，但我平時自己慳得就慳，我今日用兩蚊搭小巴同天星小輪過嚟，用咗4蚊囉！媽咪教落，應使就使，寧願慳自己唔好慳人哋，對人哋要好啲，佛教都教佈施，你帶飯請人食，我已經有喇！我先可以請到人食，都係一件好事！」
記者：林碧洋
攝影：羅安強
場地提供：馬可孛羅酒店
